Pages

Ads 468x60px

Labels

Nov 15, 2012

ထွက်ဖြစ်/ မဖြစ်တဲ့ ခရီးစဉ်တစ်ခု

ဒီကနေ့ (13-11-2012) ခရီးထွက်ဖြစ်တယ်။
ခရီးထွက်ဖြစ်တယ်လုို့ နာမည်တပ်ရတာက အကြောင်းမဲ့တော့ မဟုတ်ပါ။ ဒီခရီးနှင့် ပတ်သက်ပြီး ခရီးထွက်ဖြစ် / မဖြစ် လနှင့်ချီပြီးမှ ဆုံးဖြတ်ခဲ့ရတာပါ။ မထွက်ရင်လည်း ဖြစ်တဲ့ ခရီးပါ။ ဒါပေမယ့် ထွက်ဖြစ်မှ ပြီးပြည့်စုံတဲ့ ခရီး ပေါ့။ ဒီလိုပဲ တေးကျော့ရလေမလားပဲ။

ရှုပ်များ သွားပလား။ ရှင်းပြပါ့မယ်။ စာရေးသူက သုတေသနဘွဲ့အတွက် မွန်းဘုိုင်မြို့မှာ နေထုိုင်ပြီး၊ မွန်းဘုိုင်းတက္ကသုိုလ်ကနေ ကျမ်းပြုနေတာ လေးနှစ်ပြည့်တော့မယ်။ သူငယ်ချင်းက မော်လမြိုင်မြို့က အထင်ကရ စာသင်တုိုက်တစ်တုိုက်မှာ နှစ်လရှည်ကြာ စာချပေးနေတဲ့သူ။ ဒီအထိတော့ ဘာမှလည်း ထူးမခြားသေးပါဘူး။ အဲ ထူးတာက ဘာအကြံတွေပေါက်လုို့ ဘယ်လုိုအတွေးရောက်သလဲတော့ မသိပါ။ သူငယ်ချင်းက ဒီနှစ် သူနဲ့နီးစပ်ရာ ဒကာ ဒကာမတွေကော၊ သူရဲ့ဆွေတော် မျိုးတော်တွေကုိုကော ဗုဒ္ဓဂယာ ဘုရားဖူး လုိုက်ပုို့ချင်လုို့ သင်္ကြန်ကတည်းက စာရင်းသွင်းထားတယ်တဲ့။ အခုတော့ ဘုရားဖူး သွားရမည့်အလှည့် ရောက်လာပါပြီတဲ့။ စလာပါပြီ ဇာတ်ကွက်က။

သူ့နှင့်အတူ လုိုက်ပါလာတဲ့ အဖွဲ့သူအဖွဲ့သားများရဲ့ စာရင်းအရတော့ မိမိနှင့် တစ်နည်းတစ်ဖုံ ပတ်သက်တဲ့သူချည်းပါပဲ။ သူ့ဆရာ ကုိုယ့်ဆရာ၊ သူ့ဒကာ ကုိုယ့်ဒကာပေါ့။ သူ့ရဲ့ ဘုရားဖူးခရီးစဉ်မှာ စာရေးသူကုိုလည်း အဖော်အဖြစ် လုိုက်ပါစေချင်တယ်။ ဒါမှ ဒီခရီးဟာ သူ့အတွက် ပုိုပြီး အားရသလုို တုိုး၍လည်း ပျော်စရာကောင်းမှာပါ။ ဒီခရီးက သူ့အတွက် စိမ်းမနေသလုို (သုံးခေါက်မြောက် ထင်ပါ့) စာရေးသူအတွက်လည်း သုံးလေးခါက်ထက် မနည်း သွားဖူးတဲ့ ခရီးပါ။ သက်သက် ရောင်းရင်းတွေ စုံစုံလင်လင်နဲ့ ဘုရားဖူးချင်တဲ့ ဆန္ဒကလွဲရင် အခြားအကြောင်း မရှိတန်ကောင်းပါဘူး။ ဒါကြောင့်လည်း စာရေးသူ တုန့်ဆုိုင်းတုန့်ဆုိုင်းနဲ့ လုိုက်ပါသလုိုလုို မပါသလုိုလုိုနဲ့ သူနဲ့ အွန်းလုိုင်းမှာ ဆုံတုိုင်း အင်တင်တင် လုပ်နေတာပါ။

စာရေးသူဘက်ကုိုလည်း လှည့်ကြည့်ဦးလေ။ အောက်တုိုဘာလကတည်းက တက္ကသုိုလ်မှာ ကျမ်းအကျဉ်း တင်ထားနှင့်ပြီ။ မကြာမှီ ကျမ်းကြီးကုို မဖြစ်မနေ တင်ရတော့မယ်။ ကျမ်းကြီး တင်နုိုင်ဖုို့ တအားကုို စုိုင်းပြင်းနေရတဲ့အချိန်လေ။ ကျမ်းကုို မှတ်လုိုက်၊ အချောသတ်လုိုက်။ စာကြည့်တုိုက်ကုို ပြေးလုိုက်၊ အကုိုးအကားတွေ တုိုက်ကြည့်လုိုက်နဲ့ ချာလပတ် လည်နေတဲ့ အချိန်ပေါ့။ ခရီးထွက်လုိုက်ရင် တစ်ရက်ဆုို တစ်ရက် သိသိသာသာကြီး ရက်တွေ ပုပ်သွားမှာကုိုး။

 ပြီးတော့ သူ့ဘက်ကလည်း လုိုက်ပါလာမယ့် ဗုဒ္ဓဂယာ ဘုရားဖူးခရီးစဉ်ကလည်း မနှစ်ကမှ ဘုရားဖူးခရီးစဉ်ကုို စတင်ခဲ့တဲ့ ဟံသာမွန်အဖွဲ့။ ဟံသာမွန်အဖွဲ့ဆုိုတာ တုိုးTour အဖွဲ့ အသစ်လေးပါ။ ဒီအဖွဲ့က မိမိရဲ့ ရန်ကုန်ကျောင်းကုို ကျောထောက်နောက်ခံထားတဲ့ အဖွဲ့။ တည်းခုိုရမယ့် နေရာထုိုင်ခင်းအတွက်ကော၊ ဘုရားဖူးရာ လုိုက်ပါရှင်းပေးမယ့် ဂုိုက်ကော အတည်တကျ မရှိသေးဘူး။ ဒီအဖွဲ့ ရေရှည် အားကုိုး တည်းခုိုမယ့်နေရာက ရာမညဘူမိ ဗုဒ္ဓ၀ိဟာရကျောင်း။ အဲဒီမွန်ဘုန်းတော်ကြီးကျောင်းကလည်း ဆောက်လုပ်ဆဲ။ ဒီနှစ်အတွက် တည်ခုိုးဖုို့ ဘယ်လုိုမှ အဆင်မပြေသေးတဲ့ အနေအထား။ လုိုက်ပုို့မယ့် ဂုိုက်ကလည်း စာသင်နေဆဲ စာသင်သားတွေဆုိုတော့ ကျွမ်းကျင်တဲ့အဆင့် မရောက်ကြသေးဘူး။ သူလုိုလုို ကုိုယ်လုိုလုို ထူးမခြားနားတဲ့ မရှိသုံး ဂုိုက်အဖြစ် လုိုက်ပေးနေရတဲ့ သဘောပါ။ ၂-ဘက်စလုံး ကျဉ်းကြပ်နေတဲ့ အနေအထားပါ။ ဒါကြောင့်လည်း ချိတုံချတုံ လလုံးချီ အချိန်ယူ စဉ်းစားနေရတယ်။ သူတုို့နဲ့ လုိုက်ပါသင့် မသင့်ပေါ့။

အဲ… အခက်အခဲတုို့ရဲ့ နောက်ကွယ်မှာ အချိန်ဆုိုတဲ့ အကျော်အလွှားလေးဆုိုတာ ရှိတတ်တယ်မှုတ်လား။ အချိန်တန်လာတော့ အကျော်အလွှားလေးနဲ့ ဖြေရှင်းနုိုင်ခဲ့တယ်။ သူဘက်က ဗုဒ္ဓဂယာခရီးတစ်လျောက် တစ်ထောက်နားရမယ့် ဘုန်းတော်ကြီးကျောင်းတွေကလည်း ရက်မလွတ်လုို့ မူလခရီးစဉ်ကုို တစ်ပတ် နောက်ဆုတ်လုိုက်တယ်။ စာရေးသူဘက်က ခရီးထွက်နေတဲ့ စာရေးသူရဲ့ စူပါဗုိုက်ဆာ (ကျမ်းစစ်ဆရာမ) ကလည်း ပြန်ရောက်လာ။ ပြန်ပြင်ဆင်ရမယ့် ကျမ်းကလည်း မှန်းသလောက်မများ။ ဒီတော့ကာ ကျမ်းကြီးရဲ့ အချောသတ်ကျမ်းဟာ နုိုဝင်ဘာ ၁၁ ရက်နေ့မှာ အဆုံးသတ်နုိုင်ခဲ့တယ်။ ရှဥ့်လည်းလျောက်သာ ပျားလည်းဆွဲသာတဲ့ အကျော်အလွှားလေး ရလာတယ်။ ဒါကြောင့် ကုန်ကျ စရိတ်ကုို ထည့်မတွက်ဘဲ ခရီးစဉ်ချောမွေ့ရေးအတွက် ဦးစားပေးပြီး ဗုဒ္ဓဂယာကုို ၁၃-ရက်နေ့မှာ ရောက်လာမယ့် သူငယ်ချင်းဆီ လေယာဉ်ခရီးနဲ့ ဂယာဆီကုို ချီတက်လုိုက်ပါတော့တယ်။

ဆက်ရန်-